தமிழ்நாட்டில் சமூகநீதி விடுதிகளில் தங்கி கல்வி பயிலும் மாணவ, மாணவியருக்கு வழங்கப்படும் மாதாந்திர உணவுக் கட்டணம் உயர்த்தப்பட்டுள்ளது. இதற்கான அரசாணையை சமூகநீதித்துறை அக்டோபர் 21, 2026 அன்று வெளியிட்டுள்ளது. மாணவர்களுக்கு தரமான மற்றும் சத்தான உணவு வழங்கும் நோக்கில் இந்த நடவடிக்கை எடுக்கப்பட்டுள்ளதாக சமூகநீதித்துறை அமைச்சர் வன்னி அரசு தெரிவித்துள்ளார்.
மானியக் கோரிக்கையின்போது வெளியான அறிவிப்பு
2026–2027-ஆம் நிதியாண்டிற்கான சமூகநீதித்துறையின் மானியக் கோரிக்கையின்போது, விடுதிகளில் தங்கி பயிலும் மாணவர்களுக்கு வழங்கப்படும் மாதாந்திர உணவுக் கட்டணம் உயர்த்தப்படும் என அமைச்சர் வன்னி அரசு அறிவித்திருந்தார். இந்த அறிவிப்பைச் செயல்படுத்தும் வகையில் தற்போது அரசாணை வெளியிடப்பட்டுள்ளது.
இதன்படி, ஆதிதிராவிடர் மற்றும் பழங்குடியினர் நலத்துறைகளின் கீழ் செயல்படும் பள்ளி, கல்லூரி விடுதிகள் மற்றும் உண்டு உறைவிடப் பள்ளிகளில் தங்கி கல்வி பயிலும் மாணவர்களுக்கு உயர்த்தப்பட்ட உணவுக் கட்டணம் வழங்கப்பட உள்ளது.
பள்ளி மாணவர்களுக்கு எவ்வளவு உயர்வு?
ஆதிதிராவிடர் நலப் பள்ளி விடுதிகள், பழங்குடியினர் நலப் பள்ளி விடுதிகள், அரசு உண்டு உறைவிடப் பள்ளிகள், வனத்துறைப் பள்ளிகள் மற்றும் தொண்டு நிறுவனங்களால் நடத்தப்படும் பள்ளி விடுதிகளில் தங்கிப் படிக்கும் மாணவர்களுக்கான மாதாந்திர உணவுக் கட்டணம் உயர்த்தப்பட்டுள்ளது.
இதுவரை மாதம் ரூ.1,400 வழங்கப்பட்டு வந்த நிலையில், இனி ரூ.1,800 வழங்கப்படும். இதன் மூலம் ஒவ்வொரு மாணவருக்கும் மாதந்தோறும் ரூ.400 கூடுதலாகக் கிடைக்கும்.
கல்லூரி மாணவர்களுக்கு மாதம் ரூ.2,000
கல்லூரி விடுதிகளில் தங்கி கல்வி பயிலும் மாணவ, மாணவியருக்கான உணவுக் கட்டணமும் அதிகரிக்கப்பட்டுள்ளது. இதுவரை மாதம் ரூ.1,500 வழங்கப்பட்டு வந்த நிலையில், இனி ரூ.2,000 வழங்கப்படும்.
இதன் மூலம் கல்லூரி மாணவர்களுக்கு மாதந்தோறும் ரூ.500 கூடுதலாக உணவுக் கட்டணமாகக் கிடைக்கும். உயர்த்தப்பட்ட தொகைக்கு ஏற்ப உணவுப் பட்டியல் மாற்றியமைக்கப்படுவதுடன், மாதாந்திர தனிநபர் நுகர்வுப் பொருட்களின் அளவும் அதற்கேற்ப வழங்கப்படும் என அறிவிக்கப்பட்டுள்ளது.
ஆதிதிராவிடர் நலத்துறையின் கீழ் 1,169 விடுதிகள்
இந்தத் திட்டத்தின் கீழ் ஆதிதிராவிடர் நலத்துறையால் நடத்தப்படும் 859 பள்ளி விடுதிகள், தொண்டு நிறுவனங்களின் கீழ் செயல்படும் 18 பள்ளி விடுதிகள் மற்றும் 292 கல்லூரி விடுதிகள் என மொத்தம் 1,169 விடுதிகளில் தங்கி கல்வி பயிலும் மாணவர்களுக்கு உயர்த்தப்பட்ட உணவுக் கட்டணம் வழங்கப்படும்.
பழங்குடியினர் நலத்துறையின் கீழ் 379 விடுதிகள்
பழங்குடியினர் நலத்துறையின் கீழ் செயல்படும் அரசு பழங்குடியினர் உண்டு உறைவிடப் பள்ளிகள் 316, பழங்குடியினர் நலப் பள்ளி விடுதிகள் 38, வனத்துறைப் பள்ளிகள் 11, தொண்டு நிறுவனங்களால் நடத்தப்படும் பள்ளி விடுதிகள் 3 மற்றும் கல்லூரி விடுதிகள் 11 என மொத்தம் 379 பள்ளி மற்றும் கல்லூரி விடுதிகளில் பயிலும் மாணவர்களும் இத்திட்டத்தின் மூலம் பயன்பெற உள்ளனர்.
மொத்தம் 1,548 விடுதிகளில் பயிலும் மாணவர்களுக்குப் பயன்
ஆதிதிராவிடர் நலத்துறையின் கீழ் 1,169 விடுதிகளும், பழங்குடியினர் நலத்துறையின் கீழ் 379 விடுதிகளும் என மொத்தம் 1,548 பள்ளி மற்றும் கல்லூரி விடுதிகளில் தங்கிப் பயிலும் மாணவ, மாணவியருக்கு இந்த உணவுக் கட்டண உயர்வு நடைமுறைப்படுத்தப்பட உள்ளது.
விடுதிகளில் பயிலும் மாணவர்களுக்கு சத்தான உணவு கிடைப்பதை உறுதி செய்வதற்காக, உணவுக் கட்டணத்தை உயர்த்துவதுடன் அதற்கேற்ற உணவுப் பட்டியலும் நுகர்வுப் பொருட்களின் அளவும் மாற்றியமைக்கப்படுவதாக அமைச்சர் வன்னி அரசு தனது எக்ஸ் தளப் பதிவில் தெரிவித்துள்ளார்.
