தனது படங்களுக்கு எதிராக சமூக வலைதளங்களில் திட்டமிட்டு எதிர்மறையான கருத்துகள் பரப்பப்படுவதாக நடிகர் விஜய் தேவரகொண்டா தெரிவித்துள்ளார். ஒரே மாதிரியான விமர்சனங்கள் பல்வேறு கணக்குகள் மூலம் தொடர்ந்து பதிவிடப்படுவதைச் சுட்டிக்காட்டிய அவர், இத்தகைய செயல்பாடுகள் இயல்பான ரசிகர்களின் கருத்துகள் அல்ல; திட்டமிட்டு முன்னெடுக்கப்படும் பிரசாரம் என்று குற்றம்சாட்டியுள்ளார்.
‘நான் ஏன் மாற வேண்டும்?’
விஜய் தேவரகொண்டா நடிப்பில் உருவாகியுள்ள ‘ரணபலி’ திரைப்படத்தின் டிரெய்லர் வெளியீட்டு விழாவில் பேசிய அவர், தனது திரைப்பயணம் மற்றும் தொடர்ந்து எதிர்கொள்ளும் விமர்சனங்கள் குறித்து மனம் திறந்தார்.
தனது வாழ்க்கையில் இதுவரை அடைந்திருக்கும் அனைத்தும் பல ஆண்டுகால உழைப்பின் விளைவு என்று குறிப்பிட்ட அவர், தன்னுடைய தன்னம்பிக்கையை ஆணவமாகவும், வெளிப்படையான பேச்சை திமிராகவும் சிலர் புரிந்துகொள்வதற்காகத் தனது இயல்பை மாற்றிக்கொள்ள வேண்டிய அவசியமில்லை என்றார்.
தனது நேர்மையையும் ஆளுமையையும் மற்றவர்கள் தவறாகப் புரிந்துகொள்கிறார்கள் என்பதற்காகத் திரைக்கு வெளியேயும் நடிக்க வேண்டுமா என்றும் கேள்வி எழுப்பினார். தனக்கு எதிராகத் தொடர்ந்து விமர்சனங்களை முன்வைப்பவர்கள் தங்களது அணுகுமுறையை மாற்றிக்கொள்ள வேண்டும் என்பதே தனது கருத்து என்றும் தெரிவித்தார்.
‘Manufactured Hate’ – வெறுப்பு இயல்பானதா, உருவாக்கப்படுகிறதா?
தனக்கு எதிராக முன்வைக்கப்படும் அனைத்து விமர்சனங்களையும் உண்மையான ரசிகர்களின் கருத்துகளாக எடுத்துக்கொள்ள முடியாது என்று விஜய் தேவரகொண்டா தெரிவித்துள்ளார். சிலர் பல சமூக வலைதளக் கணக்குகளைப் பயன்படுத்தி, ஒரே செய்தியைப் பலமுறை பகிர்வதாக அவர் கூறினார்.
ஒருவர் தனது விருப்பத்தின் அடிப்படையில் ஒரு படத்தை விமர்சிப்பது இயல்பானது. ஆனால், பல்வேறு கணக்குகளில் ஒரே மாதிரியான கருத்துகள் தொடர்ந்து வெளிவந்தால், அது திட்டமிட்டு உருவாக்கப்படும் எதிர்மறையான பிம்பமாக இருக்கலாம் என்பது அவரது வாதம்.
இதற்காகவே ‘Manufactured Hate’ என்ற சொல்லைப் பயன்படுத்திய அவர், சமூக வலைதளங்களில் தோன்றும் ஒவ்வொரு எதிர்மறைக் கருத்தையும் தனிப்பட்ட முறையில் எடுத்துக்கொள்ள வேண்டியதில்லை என்ற புரிதலுக்கு வருவதற்கு நீண்ட காலம் தேவைப்பட்டதாகவும் கூறினார்.
‘என் தன்னம்பிக்கையை ஆணவம் என்கிறார்கள்!’
விஜய் தேவரகொண்டா தனது நடிப்புப் பயணத்தின் தொடக்கத்திலிருந்தே விமர்சனங்களைச் சந்தித்து வருகிறார். குறிப்பாக, ‘அர்ஜுன் ரெட்டி’ திரைப்படத்தின் வெற்றிக்குப் பிறகு அவரது திரை ஆளுமை, பேட்டிகளில் வெளிப்படுத்தும் கருத்துகள் மற்றும் தன்னம்பிக்கையான பேச்சு ஆகியவை பல்வேறு விவாதங்களுக்கு வழிவகுத்தன.
இதுகுறித்துப் பேசிய அவர், தன்னுடைய தன்னம்பிக்கையை ஆணவமாகவும், நேர்மையான பேச்சைத் திமிராகவும் சிலர் கருதுவதாகக் குறிப்பிட்டார்.
தான் பல ஆண்டுகளாக உழைத்து உருவாக்கிய வாழ்க்கையையும் திரைப்பயணத்தையும் மற்றவர்கள் ஏற்றுக்கொள்ளவில்லை என்பதற்காகத் தனது இயல்பை மாற்றிக்கொள்ள முடியாது என்றும் தெரிவித்தார். தனது பயணம் சிலருக்கு விருப்பமில்லாமல் இருக்கலாம்; அதற்காகத் தான் வீட்டிலேயே முடங்கிவிட வேண்டுமா என்ற கேள்வியையும் எழுப்பினார்.
ஏழு ஆண்டுகளுக்குப் பிறகு புரிந்த உண்மை !
திரையுலகில் தனது ஆரம்பகால அனுபவங்களை நினைவுகூர்ந்த விஜய் தேவரகொண்டா, நடிப்பின் மீதான ஆர்வத்துடன் சினிமாவுக்கு வந்ததாகக் கூறினார். ஆனால், திரைத்துறையில் எதிர்கொண்ட அனுபவங்கள் தனது எதிர்பார்ப்பிலிருந்து மாறுபட்டிருந்ததாகத் தெரிவித்தார்.
தனக்கு எதிராக முன்வைக்கப்படும் விமர்சனங்கள் அனைத்தையும் பல ஆண்டுகளாகத் தனிப்பட்ட முறையில் எடுத்துக்கொண்டதாகவும், கடந்த ஓராண்டில்தான் சமூக வலைதளங்களில் நடைபெறும் சில செயல்பாடுகளின் தன்மையைத் தெளிவாகப் புரிந்துகொண்டதாகவும் கூறினார்.
தனது திரைப்பயணத்தில் ஏற்பட்ட விமர்சனங்களையும் பின்னடைவுகளையும் கடந்து வந்த அனுபவம், இந்தப் பிரச்சினையைப் புரிந்துகொள்ள உதவியதாக அவர் தெரிவித்தார்.
‘ரணபலி’ ரிலீஸ் எப்போது?
ராகுல் சங்கிரித்யன் இயக்கத்தில் உருவாகியுள்ள ‘ரணபலி’ திரைப்படத்தில் விஜய் தேவரகொண்டாவுக்கு ஜோடியாக ராஷ்மிகா மந்தனா நடித்துள்ளார். திருமணத்திற்குப் பிறகு இருவரும் இணைந்து நடிக்கும் திரைப்படம் என்பதால், இப்படத்தின் மீதான எதிர்பார்ப்பு அதிகரித்துள்ளது.
மைத்ரி மூவி மேக்கர்ஸ் நிறுவனம் தயாரிக்கும் இப்படத்தில் அர்னால்ட் வோஸ்லூ உள்ளிட்டோரும் நடித்துள்ளனர். அஜய்–அதுல் இசையமைக்கும் இப்படம் அக்டோபர் 16ஆம் தேதி திரையரங்குகளில் வெளியாகத் திட்டமிடப்பட்டுள்ளது.
