தமிழ்நாடு அரசு மருத்துவமனைகளில் நோயாளிகளுக்கு வழங்கப்படும் மாத்திரை கவர்களில் இடம்பெற்றுள்ள மொழி தொடர்பான விவகாரம் தற்போது அரசியல் சர்ச்சையாக மாறியுள்ளது. கரூர், கோவை அரசு மருத்துவமனைகளில் பயன்படுத்தப்பட்ட மாத்திரை கவர்கள் தொடர்பாக திமுக முன்வைத்துள்ள விமர்சனங்களுக்கு சுகாதாரத்துறை அமைச்சர் அருண்ராஜ் பதிலளித்துள்ளார்.
தனது எக்ஸ் தளப் பதிவில் இதுகுறித்து கருத்து தெரிவித்துள்ள அமைச்சர், தற்போது சர்ச்சைக்குள்ளாகியுள்ள கவர்களின் பயன்பாடு மற்றும் வடிவமைப்பு தொடர்பான நடவடிக்கைகள் முந்தைய திமுக ஆட்சிக் காலத்திலேயே மேற்கொள்ளப்பட்டதாக குற்றம்சாட்டியுள்ளார்.
கரூர் மருத்துவமனையில் என்ன நடந்தது?
கரூர் அரசு மருத்துவக் கல்லூரி மருத்துவமனையில் நோயாளிகளுக்கு வழங்கப்படும் மாத்திரை கவர்கள் வழக்கமாக மத்திய சிறையில் இருந்து பெறப்பட்டு வந்ததாக அமைச்சர் தெரிவித்துள்ளார். அந்த கவர்களில் காலை, மதியம், இரவு உள்ளிட்ட மாத்திரை உட்கொள்ளும் நேரங்கள் தமிழில் முத்திரையிடப்பட்டு வழங்கப்பட்டதாகவும் கூறியுள்ளார்.
கடந்த 2025 டிசம்பர் மாதத்தில் மத்திய சிறையில் இருந்து பெறப்படும் கவர்களுக்கு தட்டுப்பாடு ஏற்பட்டதாகவும், இதையடுத்து ஈரோடு மாவட்ட அச்சக தொழில் கூட்டுறவு சங்கம் மூலம் 4 லட்சம் கவர்கள் அச்சிடுவதற்கான அவசர ஆணை பிறப்பிக்கப்பட்டதாகவும் அமைச்சர் குறிப்பிட்டுள்ளார்.
இந்த நடவடிக்கை திமுக ஆட்சிக் காலத்திலேயே மேற்கொள்ளப்பட்டதாகவும், பின்னர் அந்த கவர்கள் பயன்பாட்டுக்கு வந்ததாகவும் அவர் தெரிவித்துள்ளார்.
கோவை கவர் விவகாரத்திலும் பரபரப்பு
கோவை அரசு மருத்துவமனைகளில் பயன்படுத்தப்பட்ட கவர்கள் தொடர்பாகவும் அமைச்சர் விளக்கம் அளித்துள்ளார். அவற்றுக்கான நிர்வாக அங்கீகாரம் மற்றும் அச்சிடும் நடைமுறைகள் ஏற்கனவே முந்தைய ஆட்சிக் காலத்தில் மேற்கொள்ளப்பட்டதாக அவர் தெரிவித்துள்ளார்.
இதனை சுட்டிக்காட்டியுள்ள அமைச்சர், அப்போதைய நடைமுறைகள் குறித்து எந்த கேள்வியும் எழுப்பாமல் இருந்துவிட்டு, தற்போது அதே விவகாரத்தை முன்வைத்து அரசியல் செய்வதாக திமுக மீது விமர்சனம் வைத்துள்ளார்.
“இப்போது மட்டும் ஏன் கேள்வி?”
மொழி தொடர்பான விவகாரத்தை முன்வைத்து திமுக அரசியல் செய்வதாக குற்றம்சாட்டியுள்ள அமைச்சர் அருண்ராஜ், அந்த கவர்கள் பயன்பாட்டில் இருந்த காலத்தில் ஏன் எதிர்ப்பு தெரிவிக்கவில்லை என்றும் கேள்வி எழுப்பியுள்ளார்.
தற்போதைய அரசு புதிதாக அந்த வடிவமைப்பை உருவாக்கவில்லை என்றும், ஏற்கனவே நடைமுறையில் இருந்த ஏற்பாடுகளின் அடிப்படையிலேயே தேவைக்கேற்ப கவர்கள் கொள்முதல் செய்யப்பட்டதாகவும் அமைச்சர் தெரிவித்துள்ளார்.
சர்ச்சைக்கு அரசு உடனடி நடவடிக்கை
மாத்திரை கவர் விவகாரம் அரசின் கவனத்திற்கு வந்ததும், கரூர் மற்றும் கோவையில் சம்பந்தப்பட்ட கவர்களின் பயன்பாடு நிறுத்தப்பட்டதாக அமைச்சர் கூறியுள்ளார்.
கரூரில் மீண்டும் பழைய நடைமுறைக்கு திரும்பி, மத்திய சிறையில் இருந்து பெறப்படும் கவர்களில் தமிழ் மொழியில் தேவையான விவரங்களை முத்திரையிட்டு நோயாளிகளுக்கு வழங்க நடவடிக்கை மேற்கொள்ளப்பட்டுள்ளதாக தெரிவித்துள்ளார்.
கோவையில், நோயாளிகளின் பயன்பாட்டிற்காக தமிழ் மற்றும் ஆங்கிலம் ஆகிய இரு மொழிகளில் மட்டுமே இடம்பெறும் புதிய மாத்திரை கவர்களை தயாரித்து பயன்படுத்த நடவடிக்கை எடுக்கப்பட்டுள்ளதாகவும் அவர் குறிப்பிட்டுள்ளார்.
இருமொழிக் கொள்கையில் சமரசம் இல்லை
தமிழ் மற்றும் ஆங்கிலம் ஆகிய இரு மொழிக் கொள்கையை அரசு தொடர்ந்து கடைப்பிடிக்கும் என அமைச்சர் அருண்ராஜ் தெரிவித்துள்ளார். மொழி தொடர்பான விவகாரங்களில் எந்தவித சமரசமும் செய்யப்படாது என்றும் அவர் கூறியுள்ளார்.
மாத்திரை கவர் விவகாரத்தை முன்வைத்து திமுக மலிவான அரசியல் செய்வதாக விமர்சித்துள்ள அமைச்சர், எதிர்க்கட்சியாக ஆக்கப்பூர்வமான முறையில் செயல்பட வேண்டும் எனவும் வலியுறுத்தியுள்ளார்.
மாத்திரை கவர்களில் இடம்பெறும் மொழி தொடர்பான சர்ச்சை தற்போது அரசியல் ரீதியாகவும் விவாதத்தை ஏற்படுத்தியுள்ள நிலையில், இதற்கு திமுக தரப்பில் இருந்து அடுத்தகட்ட பதில் என்ன வெளியாகும் என்ற எதிர்பார்ப்பு உருவாகியுள்ளது.
