விமானப் பயணம் என்றாலே, பல ஆயிரம் அடி உயரத்தில் நம்மை பாதுகாப்பாக அழைத்துச் செல்லும் விமானிகள் மீதுதான் பயணிகளின் முழு நம்பிக்கையும் இருக்கும். ஆனால், அந்த விமானியின் உயிரே ஆபத்தில் சிக்கி, விமானத்தின் கட்டுப்பாடு கேள்விக்குறியாகிவிட்டால் என்ன நடக்கும்? அப்படியொரு திகிலூட்டும் சம்பவம்தான் ஃப்ளைதுபாய் விமானத்தில் நடந்தது.
துபாயிலிருந்து டெல் அவிவ் நோக்கி புறப்பட்ட Flydubai FZ1073 விமானத்தில் 174 பயணிகள் மற்றும் விமானப் பணியாளர்கள் இருந்தனர். விமானம் நடுவானில் பறந்து கொண்டிருந்தபோது, எதிர்பாராத விதமாக விமானத்தின் காக்பிட்டில் பதற்றமான சூழல் உருவானது.
இந்த விமானத்தை இயக்கியவர்களில் இந்தியாவைச் சேர்ந்த கேப்டன் ஸ்மித் மச்சாரும் ஒருவர். விமானம் பறந்து கொண்டிருந்தபோது, அவரது கோ-பைலட் திடீரென அவரைத் தாக்கியதாகக் கூறப்படுகிறது. இந்த தாக்குதலில் கேப்டன் காயமடைந்தார். ரத்தம் வழிந்த நிலையிலும், நிலைமையின் தீவிரத்தை உணர்ந்த அவர் காக்பிட் கதவைத் திறந்ததாகக் கூறப்படுகிறது.
அந்தக் கதவு திறந்ததுதான் அடுத்தடுத்து நடந்த சம்பவங்களுக்கு முக்கியமான திருப்பமாக அமைந்தது.
காக்பிட்டுக்குள் நிலைமை கட்டுக்கடங்காமல் போவதைப் பார்த்த சில பயணிகள் உடனடியாகச் செயல்பட்டனர். அவர்களில் யானிவ் ஹயூன் என்ற பயணியும் ஒருவர். பிளம்பரான அவர், தயக்கமின்றி காக்பிட்டுக்குள் சென்று தாக்குதல் நடத்தியதாகக் கூறப்படும் கோ-பைலட்டை கட்டுப்படுத்த முயன்றார்.
அவருடன் மேலும் சில பயணிகளும் இணைந்தனர். அசாஃப் ராஜுவான் மற்றும் ஸ்விகா மேனஸ் ஆகியோரும் அந்த நேரத்தில் துணிச்சலுடன் செயல்பட்டதாகக் கூறப்படுகிறது. விமானத்தின் உள்ளே இருந்த பொருட்களையே பயன்படுத்தி தாக்குதல்காரரை கட்டுப்படுத்தும் முயற்சியில் அவர்கள் ஈடுபட்டனர்.
இதில் ஒரு சுவாரஸ்யமான விஷயம் என்னவென்றால், விமானத்தை இயக்கும் தொழில்முறை பயிற்சி இவர்களுக்கு இல்லாவிட்டாலும், அந்த நொடியில் என்ன செய்ய வேண்டும் என்று யோசித்து செயல்பட்டதுதான்.
விமானம் ஆபத்தான நிலையில் கீழிறங்கிக் கொண்டிருந்தபோது, ஹயூன் விமானத்தின் கட்டுப்பாட்டு அமைப்பை நிலைநிறுத்த முயன்றதாகவும் கூறப்படுகிறது. விமான விபத்துகள் தொடர்பான தொலைக்காட்சி நிகழ்ச்சிகளைப் பார்த்த அனுபவம் அந்த நேரத்தில் தனக்கு ஓரளவு உதவியதாக அவர் கூறியதாக தகவல்கள் தெரிவிக்கின்றன.
இதற்கிடையே காயமடைந்த கேப்டனின் உயிரைக் காப்பாற்ற மற்றொரு பயணி முக்கிய பங்காற்றினார். அந்த விமானத்தில் பயணம் செய்த டாக்டர் ஷோட்டா முசாயேவ், பல் மருத்துவராக இருப்பதால், காயமடைந்த கேப்டனுக்கு உடனடியாக முதலுதவி அளித்ததாகக் கூறப்படுகிறது. அதிகமாக ரத்தம் வெளியேறுவதைத் தடுக்க அவர் முயற்சி செய்தார்.
ஒருபுறம் காக்பிட்டில் தாக்குதல்காரரை கட்டுப்படுத்தும் போராட்டம்… மறுபுறம் காயமடைந்த விமானிக்கு சிகிச்சை… இதற்கிடையே விமானம் தொடர்ந்து பறந்து கொண்டிருந்தது. சில நிமிடங்களில் எடுக்கப்பட்ட இந்த முடிவுகள்தான் விமானத்தில் இருந்த நூற்றுக்கணக்கானோரின் உயிரைக் காப்பாற்றியதாகக் கூறப்படுகிறது.
இறுதியில் விமானம் சவுதி அரேபியாவின் தபுக் நகரில் பாதுகாப்பாக தரையிறக்கப்பட்டது. இதனால் மிகப்பெரிய விபத்து தவிர்க்கப்பட்டது. இந்தச் சம்பவத்தில் கவனம் ஈர்ப்பது விமானிகளின் பங்களிப்பு மட்டுமல்ல. இக்கட்டான சூழலில் அச்சத்தில் உறைந்து போகாமல், தங்களால் முடிந்ததைச் செய்ய முன்வந்த பயணிகளின் செயல்பாடுகளும் முக்கியமானதாக பார்க்கப்படுகிறது.
ஒரு பைலட் உயிருக்கு போராடிய நேரம்… காக்பிட்டில் ஏற்பட்ட குழப்பம்… விமானம் கட்டுப்பாட்டை இழக்கும் அபாயம்… அந்த சில நிமிடங்களில் முன்னெடுக்கப்பட்ட துணிச்சலான நடவடிக்கைகள்… விமானத்தில் இருந்த 174 பயணிகளுக்கும் அந்த சில நிமிடங்கள் எவ்வளவு முக்கியமானவை என்பதை நினைத்துப் பார்த்தாலே இந்த சம்பவத்தின் திகில் புரியும்.
