ஜெம் கிரானைட்ஸ் நிறுவனர் வீரமணி மீதான போக்சோ வழக்கு தீவிரமடைந்ததைத் தொடர்ந்து, கடந்த செப்டம்பர் 24-ம் தேதி டி.ஜி.பி. மகேஷ்குமார் அகர்வால் சிறப்பு புலனாய்வுக் குழுவை அமைத்தார்.
கூடுதல் காவல் ஆணையர் தேன்மொழி தலைமையில் அமைக்கப்பட்ட இந்தக் குழுவில், இணை ஆணையர் திஷா மிட்டல், காவல் கண்காணிப்பாளர் முத்தரசி, துணை ஆணையர் கீதாஞ்சலி ஆகியோர் இடம்பெற்றிருந்தனர். சென்னை காவல் ஆணையர் அமல்ராஜ் மேற்பார்வையில் இந்த விசாரணை நடைபெறும் என அறிவிக்கப்பட்டிருந்தது.
வழக்கில் ஏற்கெனவே விசாரணை அதிகாரிகளின் செயல்பாடுகள் குறித்த கேள்விகள் எழுந்திருந்த நிலையில், எஸ்.ஐ.டி. அமைக்கப்பட்டதும் விசாரணை வேகம் எடுத்தது. இந்நிலையில், குழுவில் இடம்பெற்றிருந்த கீதாஞ்சலி விலகக் கோரியிருப்பது போலீஸ் வட்டாரத்தில் கவனம் பெற்றது.
கீதாஞ்சலி ஏன் விலகினார்?
ஜெம் வீரமணி விவகாரத்தை இதற்கு முன்பு மத்திய குற்றப்பிரிவு விசாரித்தது. அந்த விசாரணையைக் கண்காணித்த உயரதிகாரிகளுடன் கீதாஞ்சலி ஏற்கெனவே பணியாற்றியிருப்பதாகக் கூறப்படுகிறது. இதனால், தற்போது அதே விவகாரம் தொடர்பாக அமைக்கப்பட்டுள்ள புதிய எஸ்.ஐ.டி-யில் தான் இடம்பெறுவது சரியாக இருக்காது என்ற எண்ணம் அவருக்கு ஏற்பட்டதாகக் கூறப்படுகிறது.
மேலும், இந்த வழக்கின் முந்தைய விசாரணை தொடர்பாக தன் மீதும் பல்வேறு குற்றச்சாட்டுகள் முன்வைக்கப்பட்டிருப்பதாகவும், இதுபோன்ற சூழலில் விசாரணைக் குழுவில் தொடர்ந்து இருப்பது சர்ச்சையை ஏற்படுத்தக்கூடும் என்றும் அவர் கருதியதாகச் சொல்லப்படுகிறது. இதனுடன், தனிப்பட்ட காரணங்களையும் சுட்டிக்காட்டி எஸ்.ஐ.டி-யிலிருந்து விலக அவர் விருப்பம் தெரிவித்ததாக போலீஸ் வட்டாரத் தகவல்கள் தெரிவிக்கின்றன.
‘விலகல்’ பின்னணியில் இன்னொரு கதை?
இதற்கிடையே, கீதாஞ்சலி குறிப்பிட்ட சில ஐ.பி.எஸ் அதிகாரிகளுடன் நெருக்கமாகப் பணியாற்றியவர் என்பதால், விசாரணை தொடர்பான தகவல்கள் வெளியே செல்லும் வாய்ப்பு இருப்பதாக மேலிடத்துக்கு சிலர் தெரிவித்ததாகவும் போலீஸ் வட்டாரங்களில் பேசப்படுகிறது.
குறிப்பாக, வழக்கை மீண்டும் தீவிரமாகத் தோண்டி எடுத்த அதிகாரி தரப்பிலிருந்து இதுபோன்ற சந்தேகங்கள் மேலிடத்தின் கவனத்துக்குக் கொண்டு செல்லப்பட்டதாகவும் கூறப்படுகிறது. இந்தப் பின்னணியில்தான் கீதாஞ்சலியின் விலகல் கவனம் பெற்றிருக்கிறது.
முத்தரசியும் மாற்றப்படுவாரா?
தற்போதைய எஸ்.ஐ.டி-யில் இடம்பெற்றுள்ள துணை ஆணையர் முத்தரசி குறித்தும் காவல்துறை வட்டாரங்களில் சில தகவல்கள் உலா வருகின்றன. அவரும் குற்றச்சாட்டுகளுக்கு உள்ளானதாகக் கூறப்படும் ஒரு ஐ.பி.எஸ் அதிகாரியுடன் நெருக்கமாகப் பணியாற்றியவர் என்பதால், அவரையும் குழுவிலிருந்து மாற்றுவது குறித்து மேலிடத்தில் ஆலோசனை நடைபெறுவதாகக் கூறப்படுகிறது.
ஆனால், முத்தரசியை எஸ்.ஐ.டி-யிலிருந்து மாற்றுவது தொடர்பாக இதுவரை அதிகாரப்பூர்வ உத்தரவு வெளியாகவில்லை. எனவே, இது தற்போதைக்கு ஆலோசனை என்ற நிலையிலேயே பார்க்கப்படுகிறது.
விசாரணை எங்கே போகிறது?
ஜெம் வீரமணி வழக்கில் ஆரம்பகட்ட விசாரணை முதல் தற்போது அமைக்கப்பட்டுள்ள எஸ்.ஐ.டி வரை காவல்துறையின் நடவடிக்கைகள் தொடர்ந்து கவனிக்கப்பட்டு வருகின்றன. வழக்கில் முன்பு தாக்கல் செய்யப்பட்ட முடிவு அறிக்கையை சிறப்பு போக்சோ நீதிமன்றம் ஏற்காமல், கூடுதல் விசாரணைக்கு உத்தரவிட்டதன் பின்னரே விசாரணை மீண்டும் தீவிரமடைந்தது. பின்னர் பாதிக்கப்பட்டதாகக் கூறப்படும் சிறுமி அடையாளம் காணப்பட்டதையடுத்து வீரமணி உள்ளிட்டோர் கைது செய்யப்பட்டனர்.
விசாரணை டீமிலேயே மாற்றமா..!
ஜெம் வீரமணி வழக்கில் ஏற்கெனவே விசாரணை தொடர்பாக பல்வேறு கேள்விகள் எழுந்துள்ள நிலையில், அதை மீண்டும் விசாரிக்க சிறப்பு புலனாய்வுக் குழு அமைக்கப்பட்டது. இப்போது அந்தக் குழுவில் இடம்பெற்றிருந்த ஒரு அதிகாரியே விலகியிருப்பது காவல்துறை வட்டாரத்தில் கவனம் பெற்றுள்ளது.
ஒருபக்கம், முந்தைய விசாரணையுடன் இருந்த தொடர்பு… மறுபக்கம் தன் மீதான குற்றச்சாட்டுகள்… அதற்கு மேல் தனிப்பட்ட காரணங்கள் என கீதாஞ்சலியின் விலகலுக்குப் பல காரணங்கள் சொல்லப்படுகின்றன.
இதற்கிடையே, எஸ்.ஐ.டி-யில் அடுத்த மாற்றம் இருக்குமா என்ற கேள்வியும் எழுந்துள்ளது. கீதாஞ்சலி விலகல்… முத்தரசி பெயரும் அடிபடுகிறது… ஜெம் வீரமணி வழக்கின் விசாரணைக் குழுவுக்குள் அடுத்தடுத்து என்ன நடக்கப்போகிறது? என்பதுதான் இப்போது ஹாட் டாபிக்.
