கால்பந்து நட்சத்திரம் கிறிஸ்டியானோ ரொனால்டோவும், அவரது நீண்டகால காதலியான ஜார்ஜினா ரோட்ரிக்ஸும் கடந்த ஆகஸ்ட் 11ஆம் தேதி போர்ச்சுகலில் உள்ள தங்களது வீட்டில் நெருங்கிய குடும்பத்தினர் மற்றும் நண்பர்கள் முன்னிலையில் திருமணம் செய்துகொண்டனர். பிரம்மாண்டமான திருமண விழாவைத் தவிர்த்து, தங்களது குழந்தைகளுடன் மிகவும் எளிமையான முறையில் திருமணத்தை நடத்தினர்.
இந்த திருமணம், இருவரும் முதன்முதலில் சந்தித்ததன் 10ஆம் ஆண்டு நிறைவையொட்டியும் அமைந்தது. மாட்ரிட்டில் உள்ள Gucci கடையில் ஜார்ஜினா பணியாற்றியபோது இருவரும் சந்தித்ததாக கூறப்படுகிறது. திருமண நிகழ்வில் ரொனால்டோ-ஜார்ஜினாவின் ஐந்து குழந்தைகளும் பங்கேற்றனர்.
திருமணத்திற்காக வெள்ளை நிற Gucci ஸ்கர்ட் சூட் அணிந்திருந்த ஜார்ஜினா, அதனுடன் Chopard நிறுவனத்தின் பிரபலமான Garden of Kalahari High Jewellery தொகுப்பைச் சேர்ந்த வைர நெக்லஸ் மற்றும் காதணிகளை அணிந்திருந்தார். எளிமையான திருமண ஆடையுடன் பிரம்மாண்டமான வைர நகைகளை அவர் இணைத்திருந்தார்.
இந்த நகைகளின் பின்னணியிலும் ஒரு சுவாரஸ்யமான கதை உள்ளது. போட்ஸ்வானாவின் கலஹாரி பகுதியில் உள்ள Karowe சுரங்கத்தில் கண்டெடுக்கப்பட்ட 342 கேரட் எடையுள்ள மிகப்பெரிய வைரக் கல் இதன் அடிப்படையாக அமைந்தது. Chopard நிறுவனத்தின் இணைத் தலைவரும் கலை இயக்குநருமான Caroline Scheufele, அந்த அரிய வைரத்திற்கு ‘The Queen of Kalahari’ எனப் பெயரிட்டார்.
குறிப்பாக, இந்த வைரமானது D Colour மற்றும் Flawless Clarity எனப்படும் மிக உயர்ந்த தரத்தைக் கொண்டிருந்ததாக கூறப்படுகிறது. பின்னர் அந்த 342 கேரட் கச்சா வைரம் 23 தனித்தனி வைரங்களாக வெட்டப்பட்டது. அவற்றில் 20 கேரட்டுக்கும் அதிகமான எடை கொண்ட ஐந்து வைரங்கள் இந்த பிரம்மாண்ட நகைத் தொகுப்பின் முக்கிய கற்களாக மாறின.
அதில் மிகப்பெரிய 50 கேரட் வைரம் சூரியகாந்தி மலர் வடிவமைப்பிலும், 26 கேரட் இதய வடிவ வைரம் pansy மலர் வடிவிலும், 25 கேரட் pear-cut வைரம் banana blossom வடிவிலும் பயன்படுத்தப்பட்டுள்ளன. மேலும் 20 கேரட் cushion-cut மற்றும் 21 கேரட் emerald-cut வைரங்களும் வெவ்வேறு மலர் வடிவமைப்புகளில் இடம்பெற்றுள்ளன.
இந்த Garden of Kalahari தொகுப்பில் நெக்லஸ், காதணிகள் மட்டுமின்றி வளையல், இரண்டு மோதிரங்கள் மற்றும் ரகசியமாக மறைக்கப்பட்ட கடிகாரம் உள்ளிட்ட ஆறு விதமான நகைகளும் இடம்பெற்றுள்ளன. சில நகைகளில் உள்ள வைரப் பதக்கங்களை கழற்றி, காதணிகளுடன் இணைத்துக்கொள்ளும் வகையிலும் வடிவமைக்கப்பட்டுள்ளது.
திருமண விழாவில் ஜார்ஜினா அணிந்திருந்த நெக்லஸ் மற்றும் காதணிகள், அவரது வெள்ளை நிற ஆடையின் எளிமைக்கு முற்றிலும் மாறாக பிரம்மாண்டமாக காட்சியளித்தன. பின்னர் நடைபெற்ற போட்டோஷூட்டிலும் Garden of Kalahari தொகுப்பின் பல நகைகளை ஒரே நேரத்தில் அணிந்து அவர் போஸ் கொடுத்திருந்தார்.
342 கேரட் கச்சா வைரமாகத் தொடங்கி, 23 அரிய வைரங்களாக மாறி, இறுதியில் ஜார்ஜினாவின் திருமண நகைகளில் இடம்பிடித்த ‘Queen of Kalahari’ வைரத்தின் பயணம் தற்போது மீண்டும் பேசுபொருளாகியுள்ளது. இதன் விலை இந்திய மதிப்பில் ரூ.700 கோடி என்று சொல்லப்படுகிறது.
