SIR நடவடிக்கைக்கு எதிராக தமிழ்நாட்டில் வலுவான மக்கள் போராட்டம் ஏன் எழவில்லை என நடிகர் பிரகாஷ் ராஜ் கேள்வி எழுப்பியுள்ளார். இடஒதுக்கீடு, நீட், தொகுதி மறுவரையறை உள்ளிட்ட விவகாரங்களில் நாடு முழுவதும் கவனம் ஈர்க்கும் வகையில் போராடிய தமிழ்நாடு, SIR விவகாரத்தில் மட்டும் ஏன் அமைதியாக இருக்கிறது என்றும் அவர் கேள்வி எழுப்பினார்.
சென்னையில் அக்டோபர் 6-ம் தேதி செய்தியாளர்களை சந்தித்த பிரகாஷ் ராஜ், SIR விவகாரத்தை எந்தக் கட்சி வெற்றி பெறும், எந்தக் கட்சி தோல்வியடையும் என்ற அரசியல் கணக்கில் பார்க்கவில்லை என்றும், ஒவ்வொரு குடிமகனுக்கும் உள்ள வாக்குரிமை பாதுகாக்கப்பட வேண்டும் என்பதே தனது கவலை என்றும் தெரிவித்தார்.
“6 மாதத்துக்குள் SIR ஏன்?”
இறுதி வாக்காளர் பட்டியல் வெளியிடப்பட்ட சில மாதங்களிலேயே மீண்டும் SIR நடத்த வேண்டிய அவசியம் என்ன என கேள்வி எழுப்பிய பிரகாஷ் ராஜ், குறுகிய காலத்தில் கோடிக்கணக்கான வாக்காளர்களின் விவரங்களை எப்படி சரிபார்க்க முடியும் என்றும் கேள்வி எழுப்பினார்.
ஒருவர் வீட்டில் இல்லாததற்காக அவர் இடம்பெயர்ந்தவர் என்றோ, வாக்குரிமையை இழக்க வேண்டியவர் என்றோ முடிவு செய்ய முடியாது என்றும் அவர் குறிப்பிட்டார்.
“13 கோடி, 75 லட்சம், ஒரு கோடி என நாம் எண்களைப் பற்றி பேசவில்லை. அந்த எண்ணிக்கைக்குப் பின்னால் மனிதர்கள் இருக்கிறார்கள்” என்ற கருத்தையும் அவர் முன்வைத்தார்.
கர்நாடகாவில் 100 வாக்குச்சாவடிகளில் ஆய்வு செய்ததாகக் கூறிய பிரகாஷ் ராஜ், ஒரே வீட்டில் பல ஆண்டுகளாக வசிப்பவர்கள் இடம்பெயர்ந்தவர்கள் என்றும், உயிருடன் இருப்பவர்கள் இறந்தவர்கள் என்றும் வாக்காளர் பட்டியல் தொடர்பான பதிவுகளில் குறிப்பிடப்பட்டிருந்ததாகக் கூறினார்.
“தமிழ்நாடு ஏன் சைலண்ட்டா இருக்கு?”
இதுதான் பிரகாஷ் ராஜின் முக்கிய கேள்வியாக அமைந்தது.
“இடஒதுக்கீடு, நீட், தொகுதி மறுவரையறை என இந்தியாவுக்கே தமிழ்நாடு தனது போராட்டத்தை காட்டியிருக்கிறது. அந்த தமிழ்நாடு ஏன் SIR விவகாரத்தில் சைலண்ட்டாக இருக்கிறது?” என அவர் கேள்வி எழுப்பினார். SIR மூலம் வாக்குரிமை பாதிக்கப்படுவதாக மக்கள் கருதினால், அதற்காக ஜனநாயக முறையில் குரல் கொடுக்க வேண்டும் என்றும் அவர் வலியுறுத்தினார்.
“விஜய் ஏன் செய்தியாளர்களை சந்திக்கவில்லை?”
இந்த நிலையில், தமிழ்நாடு அரசின் நிலைப்பாடு என்ன என்ற கேள்வியும் எழுகிறது. தற்போது தமிழ்நாடு முதலமைச்சராக இருக்கும் விஜய் தலைமையிலான அரசு, SIR விவகாரத்தில் என்ன நிலைப்பாட்டை எடுக்கிறது என்பதை முதலமைச்சர் விஜய் நேரடியாக செய்தியாளர்களிடம் விளக்க வேண்டும் என்ற எதிர்பார்ப்பு அரசியல் வட்டாரங்களில் எழுந்துள்ளது. இதுகுறித்த கேள்வியை செய்தியாளர்கள் விஜய்யிடம் எழுப்ப வேண்டும் என்றும் பிரகாஷ் ராஜ் வலியுறுத்தினார்.
“நீங்கள் எல்லாரும் அவரிடம் கேட்க வேண்டும்… ஏன் செல்லம் செய்தியாளர் சந்திப்பை நடத்தவில்லை? தமிழ்நாட்டின் வாக்காளர் பட்டியல் தொடர்பாக அரசின் நிலைப்பாடு என்ன? மக்களின் வாக்குரிமை குறித்து அரசு என்ன செய்யப்போகிறது?” என்ற கேள்விகளை எழுப்ப வேண்டிய அவசியம் இருப்பதாக அவர் குறிப்பிட்டார்.
முதலமைச்சராக பதவியேற்ற பிறகு விஜய் பல்வேறு அரசியல் மற்றும் நிர்வாக நிகழ்வுகளில் பங்கேற்று வரும் நிலையில், SIR போன்ற வாக்காளர் உரிமை தொடர்பான விவகாரத்தில் அவரது நேரடி விளக்கம் முக்கியமானதாக இருக்கும் என்பதே பிரகாஷ் ராஜின் கருத்தின் மையமாக உள்ளது.
“ஞானேஷ் குமார் மீது விசாரணை வேண்டும்!”
தலைமைத் தேர்தல் ஆணையர் ஞானேஷ் குமார் தேர்வு செய்யப்பட்ட விதம் குறித்தும் கேள்வி எழுப்பிய பிரகாஷ் ராஜ், முதலில் அவரை பதவியில் இருந்து நீக்க வேண்டும் என்றும், அதற்கு அடுத்ததாக அவர் மீது விசாரணை நடத்த வேண்டும் என்றும் வலியுறுத்தினார்.
SIR நடைமுறையை ரத்து செய்ய வேண்டும் என்றும், தேர்தல் ஆணையர்களைத் தேர்வு செய்யும் முறையிலும் மாற்றம் தேவை என்றும் அவர் கூறினார். 2023-ம் ஆண்டு முதல் தேர்தல் ஆணையம் எடுத்த முடிவுகள் மற்றும் அதன் விளைவுகள் தொடர்பான கோப்புகளை உச்ச நீதிமன்றம் ஆய்வு செய்ய வேண்டும் என்றும் பிரகாஷ் ராஜ் கோரிக்கை விடுத்தார்.
SIR விவகாரத்தில் கட்சிகளின் அரசியல் நிலைப்பாட்டைத் தாண்டி, பொதுமக்களின் வாக்குரிமைதான் முக்கியம் என்ற தனது நிலைப்பாட்டை மீண்டும் வலியுறுத்தியுள்ள பிரகாஷ் ராஜ், இந்த விவகாரத்தில் தமிழ்நாடு அரசு என்ன நடவடிக்கை எடுக்கப் போகிறது என்பதையும் கேள்வியாக முன்வைத்துள்ளார்.
