படம் ஓடல… பாட்டு ஓஹோ! ‘கொட்டாம்பட்டி ரோட்டிலே’காலம் கடந்து நிற்கும் பாடல்! – Kumudam

படம் அவுட்டு… பாட்டு ஹிட்டு! – வி.ராம்ஜி

கர்நாடக சங்கீதத்தில், வயலினுக்கு தனியிடமும் உயரமும் சிம்மாசனமும் கொண்டவர்களில் மிக முக்கியமானவர் குன்னக்குடி வைத்தியநாதன். தன் வயலினைக் கொண்டு, கர்நாடக சங்கீதத்தை பட்டிதொட்டியெங்கும் பரவச் செய்ததிலும் எளிய மாந்தர்களுக்குள்ளே இசையைப் புகுத்தி,  அந்த ராக,கீத, ஆலாபனை,ஸ்வர சஞ்சாரம் தெரியாதவர்களைக் கூட, தலையசைக்க வைத்து ரசிக்கவைத்ததிலும் குன்னக்குடி வைத்தியநாதன், குன்றக்குடி மலையை விட உயர்ந்து நிற்கிறார்! .

சினிமாவுக்கு அடுத்தபடியாக பாட்டுக் கச்சேரிக்கு அப்போதெல்லாம் முக்கியத்துவம் உண்டு.  பாடல்களைக் கேட்பதிலும் முணுமுணுப்பதிலும் மிகப்பெரிய ஈர்ப்பு இருந்தது; ஆர்வம் இருந்தது. எண்பதுகளில், இளையராஜாவின் இசை, எங்கு பார்த்தாலும் ஒலித்துக்கொண்டிருந்தது. ரிக்கார்டுகளும் கேசட்டுகளும் அவற்றின் அட்டைகளும் பார்த்தே குதுகாலமான ரசிகர்கள் உண்டு. வானொலிகளின் மீது மாறாக் காதல் கொண்டிருந்தார்கள் பெண்கள். ’ஆகாசவாணி மாநிலச் செய்திகள்… வாசிப்பது சரோஜ் நாராயண்ஸ்வாமி’ என்பதை அப்பாக்கள் கேட்டார்கள்.

‘மனிதர்களே கவனியுங்கள்’ என்று பசுவின் வழியே மனிதனுக்குச் சொன்ன விவசாயத்தை விரும்பிக் கேட்ட விவசாயிகள் பலர் உண்டு. அண்ணன் கிரிக்கெட் ஸ்கோர் கேட்பான். அம்மா ‘ஒலிச்சித்திரம்’ என்று படத்தின் கதைவசனங்களை ஒலிபரப்புவார்கள். அதைக் கேட்பாள். ஆனால், பாட்டு அப்படியில்லை. போட்டாபோட்டியாக, வீடும் அக்கம்பக்கமும் களேபரமாகிவிடும்.

குறிப்பிட்ட நேரத்தில், பாடல் ஒலிபரப்புவார்கள். ஆனால், அந்த நேரத்துக்கும் முன்னதாகவே ரேடியோவுக்கு அருகில் உட்கார்ந்துகொண்டு, அலைவரிசைகளை சரியாக வைத்துக்கொண்டு, தவம் கிடந்தவர்களெல்லாம் இருக்கிறார்கள். அப்படிக் கேட்ட பாடல்கள் பல்லாயிரம். அந்த ஆயிரத்தில் ஒரு பாடலாக… மறக்கவே முடியாத பாடலாக அமைந்ததுதான் ‘கொட்டாம்பட்டி ரோட்டிலே… ஹோ ஹோய்…’ என்கிற பாட்டு!

‘அமாவாசைக்கும் அப்துல்காதருக்கும் என்னய்யா சம்பந்தம்’ என்பார்கள். ‘முழங்காலுக்கும் உச்சந்தலைக்கும் முடிச்சு போடுறியே…’ என்பார்கள். குன்னக்குடி வைத்தியநாதனுக்கும் கொட்டாம்பட்டி ரோட்டுக்கும் என்ன சம்பந்தம் என்று யாரேனும் கேட்கலாம். தொடர்பு இருப்பதால்தான், இந்தப் பதிவு; இந்த எழுத்து!

பக்தி, சினிமா, சாஸ்திரிய சங்கீதம் என்று பாடல்களையெல்லாம் கோடு கிழித்து பிரித்துக் கொள்ளாமல், எல்லாமே இசைதான்  என்று உணர்ந்து வாழ்ந்தவர்; நமக்கு உணர்த்தி வாழவைத்தவர் குன்னக்குடி வைத்தியநாதன். அவர்தான் ‘கொட்டாம்பட்டி ரோட்டிலே’ பாடலுக்கு இசையமைத்தார். அதுமட்டுமா? ‘தோடி ராகம்’ என்று படத்துக்கு தலைப்புவைத்துவிட்டு, அட்டகாசமான கிராமத்துப் பாடலைப் பாடியவரும் இவர்தான்.படத்தை இயக்கியவரும் குன்னக்குடியார்தான்!

சிவாஜியின் ‘ராஜராஜ சோழன்’ படத்துக்கும் எம்ஜிஆரின் ‘நவரத்தினம்’ படத்துக்கும் இன்னபிற படங்களுக்கும் இசையமைத்த குன்னக்குடி வைத்தியநாதனுக்கு படத்தை டைரக்ட் செய்யவேண்டும் என்று ஆசை, நெடுங்காலமாகவே இருந்தது. ஆரம்பமாக, கதையை யோசித்தார். கதாநாயகன் யார் என்று பலநாட்கள் யோசித்தார். இசைக்கதை என்பதால் இசைக்கு உரியவரே நடித்தால் நன்றாக இருக்கும் என ஒருவட்டத்தை முடிவு செய்தார். தேடினார்.

அரசியல் கட்சிகளுக்கு திருப்புமுனை தரும் ஊராகத் திருச்சியைச் சொல்லுவார்கள். ஒருமுறை, திருச்சிக்கு கச்சேரிக்காக வந்தார் குன்னக்குடி வைத்தியநாதன். கச்சேரி முடிந்ததும் காரில் சென்னைக்குக் கிளம்பினார். திருச்சி பேருந்து நிலையம் வழியே கார் வந்தது. அங்கே பேருந்துக்காகக் காத்துக்கொண்டிருந்தார் அவர். அவரும் கர்நாடக இசையுலகில் மறக்கமுடியாத மாமனிதர்தான். மதுரையில் இருந்து எக்ஸ்பிரஸ் பஸ் கிடைக்காமல், சாதாரண பஸ்சில் திருச்சி வரைக்கும் வந்தார். திருச்சியில் இருந்து எக்ஸ்பிரஸ் பஸ் கிடைக்குமா எனக் காத்திருந்தார். அவரைப் பார்த்ததும் காரை அருகில் சென்று எக்ஸ்பிரஸ் வேகத்தில் நிறுத்தச் சொன்னார் குன்னக்குடி வைத்தியநாதன்.