இடைத்தேர்தல் நிறுத்தம்… விஜயின் அரசியல் வியூகத்திற்கு நீதிமன்றம் பிரேக்? – Kumudam

“தி.மு.கவை நல்லா வெச்சு வெளுத்துவிடுங்க மக்களே!” என கரூர் மக்கள் சந்திப்பு நிகழ்ச்சியிலேயே, இடைத்தேர்தல் பிரசாரத்துக்கு த.வெ.க. தலைவர் விஜய் அச்சாரம் போட்ட அடுத்த சில நிமிடங்களிலேயே இடைத்தேர்தலுக்கு தடைவிதித்து விஜய்க்கு ஷாக் கொடுத்திருக்கிறது உயர் நீதிமன்றம். அதற்கு ஒரு வாரத்திற்கு முன்பாகவே, பிற மூன்று மாநிலங்களுக்கு இடைத்தேர்தல்களை அறிவித்த தேர்தல் ஆணையம், தமிழகத்தை சட்டையே செய்யவில்லை. இதன் பின்னணியில் டெல்லியின் சூட்சுமக் கணக்குகள் இருப்பதாக சொல்லப்படும் நிலையில், விஜய் சேர்த்துவைத்திருக்கும் ‘இலை’ படைக்கு இடைத்தேர்தலில் வாய்ப்பு கிடைக்குமா என்பதுதான் கோட்டை வட்டாரத்தில் தொங்கும் மிகப்பெரிய கொக்கி!

இதுகுறித்து மூத்த அரசியல் பார்வையாளர் ஒருவரிடம் பேசினோம். “ஆட்சி மாறி, காட்சிகளும் மாறி விஜய் முதல்வரானதும் அதிமுக எம்.எல்.ஏக்களான பெருந்துறை ஜெயக்குமார், மதுராந்தகம் மரகதம் குமாரவேல், தாராபுரம் சத்தியபாமா, அம்பாசமுத்திரம் இசக்கி சுப்பையா, விராலிமலை சி.விஜயபாஸ்கர், கரூர் எம்.ஆர். விஜயபாஸ்கர் ஆகியோர் அடுத்தடுத்து தங்கள் பதவிகளை ராஜினாமா செய்துவிட்டு த.வெ.க.வில் ஐக்கியமாகினர். அவர்கள் ராஜினாமா கடிதம் கொடுத்தவுடனேயே, அவர்கள் வென்ற சட்டமன்றத் தொகுதிகள் காலியானதாக அறிவிக்கப்பட்டது.

தேர்தல் ஆணைய விதிமுறைகளின்படி, ஒரு சட்டமன்றத் தொகுதி காலியானதாக அறிவிக்கப்பட்டதில் இருந்து ஆறு மாதத்திற்குள் இடைத்தேர்தல் நடத்தப்பட வேண்டும். தேர்தல் தொடர்பான வழக்குகள் இருந்தாலோ, பதவிக்காலம் ஓராண்டுக்கு குறைவாக இருந்தாலோ மட்டும் இந்த காலவரம்பு பொருந்தாது. அதன்படி இடைத்தேர்தலுக்கான முன்தயாரிப்பு வேலைகள் முடுக்கிவிடப்பட்டது. இதுகுறித்து சட்டப்பேரவைச் செயலகம், முறைப்படி தேர்தல் ஆணையத்திற்கு ஜூன் மாத இறுதியிலேயே தகவலும் கொடுத்திருந்தது. எனவே, எப்போது வேண்டுமானாலும் இடைத்தேர்தல் அறிவிக்கப்படலாம் எனவும் எதிர்பார்க்கப்பட்டது.

இடைத்தேர்தல்… தமிழகத்துக்கு ஏன் அறிவிப்பில்லை?
இந்த நிலையில், இடைத்தேர்தல் நடப்பது என்பதே தற்போது கடும் பிரச்னை ஆகியிருக்கிறது. கடந்த ஜூன் 2ம் தேதி மத்தியபிரதேசம், குஜராத், பீகார் ஆகிய மாநிலங்களில் உள்ள தொகுதிகளுக்கு ஜூலை 30ம் தேதி இடைத்தேர்தல் நடத்தப்படும் என்று அறிவித்த தேர்தல் ஆணையம், தமிழகத்துக்கு மட்டும் அறிவிக்கவில்லை. இதன் பின்னணியில் டெல்லியின் பல்வேறு கணக்குகள் இருப்பதாக சொல்லப்படுகிறது.

கட்சிமாறி வாக்களித்தது, குதிரை பேர புகார், ‘எங்கள் எம்.எல்.ஏ.க்களை இடைத்தேர்தலில் ஜெயிக்கவைப்பதாக விஜய் சொன்னார்’ என்று வைகோ சொன்னது ஆகியவற்றை மையப்படுத்தி எழுந்த புகார்களை வைத்துக்கொண்டு, இதுவரை தவெக. அரசை ஒரு ஓரமாக நின்று வேடிக்கை பார்த்த டெல்லி மேலிடம், தற்போது தேர்தல் ஆணையம் மூலமாகவும், நீதிமன்ற வழக்குகள் மூலமாகவும் ‘செக்’ வைத்து ஆட ஆரம்பித்துவிட்டது என சொல்லப்படுகிறது.